E je la forme italianizade di cjalzumìt “spadepurcits", doprât tant che sorenon origjinari e dopo come cognon di une persone esperte tal spadâ i purcits e altris bestiis di cjase. Al podeve volê dî ancje "spacecamin" e "fari ambulant". Come Calzimito al è difondût a San Zorç dal Tiliment e a San Filip di San Michêl; come Calzimitto si lu cjate a San Zorç dal Tiliment e a San Michêl (Castellarin, 1991). Tal Schedari Corgnali: 1522 Nicolao q. Zuliani Calcimitti a Udin; 1650 q. Nicolò detto Chialzimit di Rivalpo; 1656 Bastiana Calcimita a Prodolon; secul XVII Gialzumita di Forgaria. Tal 1608 Eredi q. Battista q. Antonio Calcimitti di Portogr.° fittuali nobb. Panigai (ASU Panigai 6). Tal 1622 Donna Elena Scalzemito a Prodolon (Buccaro, 1991).